TURA: 47-Rajabala (Gen) Legislative Assembly Constituency-ni by-election-o kamrangko ka·na gita donatako man·gipa polling official-rang, Bristibar salon, election-o jakkalna nanggipa EVM, VVPAT aro uandakgipa bosturangko Deputy Commissioner (DC) office-oniko ra·enba, an·tangtangni polling station-ona re·bildangangtokaha.
Rajabala constituency-ni ning·o dam 41 polling station-rang donga indiba ia chango COVID-19-na dongimin niamrang dongani gimin polling station damprako sak 1000-na bate pu·onna nangjana gita dam 17 polling station-rangko dondapataha ine official-rang parakataha.
Rajabala constituency-ni ning·o donggipa polling station-rangoni dam 29 polling station-de kenchakna nanggipa aro simsakbatna nanggipa polling station ong·engani gimin Election Commission, ia polling station-rangnade ma·mongni sipairang baksana a·dokni sipairangkoba donatengachim.
