TURA: Re·anggipa Budbar attamo Rajabala by-election-na campaign ka·ani matchotani ja·man Congress dolna kamko ka·enggipa manderangni jinma re·jomangengmiting somoio ia constituency-ni Garodubi songo NPP-ni manderang baksa dinggrikanio jak donggipa mande sakbriko police-rang rim·aha indiba ja·mano ia sakbrioni saksade dosgri ine nikenba watpilaha ine Bristibar salo West Garo Hills a·jani District Magistrate aro District Election Officer Ram Singh parakataha.
Dolgni ro·ong gogrikanio gimik sak 12 manderang saknaanirangko man·na nangahachim aro ia songni gaonburani nokkoba ia manderang nisie galahachim.
Indake ong·engon, ia a·selni bidingo police-rang mokordoma ka·e da·o sakgittamkode rim·na man·aha aro a·sel ong·anio jak donggipa gipin manderangkoba rim·na sandiengkua ine Deputy Commissioner parakataha.
Koborko on·ani gitade, ia sakgittamko rim·ani ja·man judicial custody-o donataha.
Ia a·selni bidingo chanchirimna gita Bristibar attamo, East Khasi Hills aro West Garo Hills a·jani deputy commissioner-rang tom·aniko ong·atenga aro ia tom·anio chief nodal officer aro SP-rangba bakko ra·enga ine a·dokni Chief Electoral Officer (CEO) Frederick R Kharkongor parakatskaaha.
Kharkongor-ni u·iatani gitade, ia damgittam Assembly constituency-rango kenchakna nanggipa aro simsakbatna nanggipa gimik dam 47 polling station-rang donga aro ianoni dam 29-de Rajabala constituency-on ong·enga. Kenchakna nanggipa aro simsakbatna nanggipa dam 47 polling station-oni dam 80-de Mawryngkneng constituency-o aro dam 10-de Mawphlang constituency-o ong·skaenga.
Ia damgittam by-election-o chel·chakanirangko on·na man·na gita ma·mongoni dolbri sipai dolrang baksana Home Guard-rangko aro a·dokni police-rangkoba rimdapaha ineba ua parakataha.