TURA: East Garo Hills a·jani District Sericulture Office aro Meghalaya Basin Development Authority (MBDA) nangrimenba, East Garo Hills a·jao donggipa dingtang dingtang songni manderangna ba·ra dokani, kilding tariani, kilding rong dim·ani aro uandakgipa jakni kamrangko skie on·na gita re·anggipa October 28 tarik dipet salbongana training program-ko Mangsang jolo donggipa Nongbak Rengkil songo ong·atenga.
Ia training program-ko ong·atanio sak 40 me·chikrang bakko ra·enga aro uamangna ba·ra dokani, kildingrangko tariani aro kildingrangko rong dim·na gita skie on·enga ine u·iataha.
Ia training program-ko a·bachengate on·angani somoio Williamnagar-ni Extra Additional Commissioner (EAC) YW Momin, mongsonggipa sokgipa ong·e jinmana aganprakangengon, chengonin A·chikrangba ba·ra dokaniko daksningbaengani gimin ba·ra dokani kamrangko nambate skie on·anichi jatni ba·ra dokaniko tangatpiltaina nangengani gimin aganangaha.
Ia training program-ko a·bachengatanio jinmana aganprakanggipa gipin manderangara, Williamnagar Basin Development Unit-ni District Program Officer Z Sangma aro Williamnagar-ni District Sericulture Officer Sanre Momin ong·a.
