SHILLONG: Re·anggipa Budbar attamo, Rajabala constituency-ni Garodubi songo dolgni dinggrikani ja·man National People’s Party (NPP)-ni manderangkode rim·gija Congress dolni manderangkosan rim·aiahani gimin Meghalaya Pradesh Congress Committee (MPCC)-ni president Vincent H Pala sing·doataha.
“Congress dolna kam ka·gipa manderangkosan sorkari rim·kuenga aro chingni manderangko ro·ong gogipa dolgipinni manderangkode uamang rim·jaenga,” ine Pala, an·tangni suk ong·gijaniko parakataha.
Ia a·selni bidingo ua West Garo Hills a·jani Deputy Commissioner aro Superintendent of Police (SP) baksa agangrikgen ineba Pala parakataha.
Ia a·sel ong·anina ja·kurangko de·engon, dolsaonikosan ong·aigija dolgnionikon rim·na nanga ine ua a·dokni Chief Electoral Officer (CEO) FR Kharkongor-na u·iatna miksongenga ineba Pala aganaha.
MPCC president-ni matnangatani gitade, ian rang·gitik a·sel ong·gipa ong·jachim indiba a·bachengonin chanchisamsoa gnang ja·ku de·anisa ong·achim.
“Haida ian sorkariba ong·engnaba gnang, ba NPP-ba ong·engnaba gnang. Congress dol bilakgipa ong·a ine ma·siesa uamang manderangko ka·mikkenatna miksongenga,” ine Pala aganaha.
A·sel ong·ani somoio Congress dolni manderang tom·a matchotesa re·angpilengachim indiba NPP-ni manderang uamangko ro·ong gosoani ja·mansa Congress-ni manderangba gochakaha ineba Pala parakataha.
Ia a·selni bidingo Congress dolni gitaba FIR-ko ka·ahachim sakgittam manderangkosan rim·e judicial custody ning·o donatkuengachim.
