SHILLONG: NPP dolko man·chape dingtang dingtang dolrango napanggipa Congress dolni dilgiparangko doltangona rimbapilna gita MPCC-ni president Vincent Pala kang·kare kaengon, Congress dolko napsrimangenggipa jahas gita toenba napsrimna skangan Congress doloni ong·kate katchina gita NPP-ni dilgipa aro a·dokni Deputy Chief Minister Prestone Tynsong, Congress dolni pilak dilgiparangko didiatskaaha.
Iani bidingo kobor ra·timgiparang baksa agangrikengon, NPP-oni Congress dolo katnapani kattade nakatja indiba Congress dolo ong·enggipa obostako ma·sigijagipa manderangsa Congress dolchi katangpilaigen ine Tynsong parakataha.
AICC-ni dal·batsranggipa dilgipa Sonia Gandhi-an Congress dolni ning·o meligrikgijaniko ku·chakmanaha ine janapatengon, “Congress dolni gimin ma·sigipa manderangde Congress dolo napjawa,” ine NPP-ni national vice president parakataha.
Tynsong-ni aganani gitade, Vincent Pala an·tangba Mukl Sangma baksa meligrikgijaniko parakmanahachim.
“Doltangni ning·o meligrikjagenchimode dilgiparang dingtanggrikrongaia aro dilgiparang dingtanggrikahaon nokdang be·gruna a·bachengaiaha. Nokdang be·gruahaon uan napsrimangenggipa jahas gitasa ong·aiaha, uni gimin na·a napsrimangenggipa jahasoni ong·kate katjagenchimode na·a siaignok,” ine Tynsong aganaha.
Congress doloni NPP-o napna sike sing·giparang dongama dongja ine sing·on, ian politics-ni gita ja·ku de·anisa ong·aia aro iako senge ninasan nangaia ine ua mamingkoba aganchakna jechakaha.
Doltangoni ong·katgipa dilgiparangko Congress dolona rimbapilna gita MPCC-ni president Vincent Pala kang·kare kaengachim aro iani bidingo NPP-ni dilgipa Dr DD Lapang-koba gronge Congress-ona re·bapilchina didiahachim ine nikna man·a.
Congress dolni gitcham dilgiparang, jekai RG Lyngdoh aro Pynshngain N Syiem-koba ua Congress dolona rimbapilna man·ahachim.
