SHILLONG: A·doko COVID tikkarangko su·na kengipa ba jechakgiparang dongkuengon, a·dok sorkari darangkoba tikka su·china drana gita man·ja ine Chief Minister Conrad Sangma aganaha.
A·doko COVID sabisini obostarangko da·o dipet Cabinet-o nipilna man·kujaoba ua, obostarangko nirokatenga ineba Pa Sangma koborni manderangna aganaha.
Dingtangatna nangenggipa protocol-rangkode un baksa agangrikani ja·mano Chief Secretary-ni gadangoni dingtangatengaha ineba CM aganaha.
COVID tikkako su·anichi dakchakbeani ong·engaha, indakoba bang·a manderangni tikka su·na jechakengani gimin ua jajrenganiko parakaha aro ian namgipa chinde ong·ja ineba chief minister aganaha.
COVID tikka ponggnikon matchote su·e ra·china gita manderangko didiatengon, sorkari darangkoba tikka su·bo ine drana man·ja, manderangko tikka su·atna gita sorkari bil ama gita jotton ka·aha aro mitam manderang da·oba tikka su·na gita kentokkuenga, Pa Sangma aganaha.
