SHILLONG: Meghalaya a·dokni damgittam Assembly constituency-rang, chong·motan Rajabala, Mawryngkneng aro Mawphlang Assembly constituency-ni by-election result-rangko da·al Mongolbar salo parakna gita siengahaon, ia damgittam by-election, mongsongbate Mawryngkneng aro Rajabala by-election-ni result-rang Congress dolna namen mongsonggipa ong·gen ine Congress dolni dilgipa Ampareen Lyngdoh parakataha.
Lyngdoh-ni parakatani gitade, Mawryngkneng aro Rajabala constituency-rangara Congress dolni seat-rangan ong·achim aro ia by-election-o ia seat damgniko Congress chepiltaina nangchongmotengachim.
“Mawryngkneng aro Rajabala seat damgnini sianggipa MLA-rangara Congress dolni MLA-rangan ong·ani gimin ia seat damgniko chepiltaianiara Congress dolna namen nangchongmotgipa ong·enga,” ine MPCC-ni working president Ampareen Lyngdoh parakataha.
Congress dolni gitcham MDC Lamphrang Blah-ba Congress doloni ong·kate NPP-o napskaahani a·sel Congress dolba Mawphlang by-election-o susaahani gimin ia Mawphlang seat-ba Congress dolna namen mongsonggipa ong·enga ineba Lyngdoh parakataha.
Ia by-election-ni result-rang 2023 bilsini Assembly election-na nangchakeani donggenma dongjawa ua name aganna man·kujaenga ineba Lyngdoh aganaha.
Rajabala by-election-o Congress dolni candidate Hashina Yasmin Mondal, NPP-ni Abdus Saleh, UDP-ni Ashahel D Shira, BJP-ni Kingston B Marak aro Independent candidate Carla Sangma baksa susaengachim ine nikna man·a.
Mawryngkneng by-election-o Congress dolni candidate Highlander Kharmalki, NPP-ni Pyniaid Sing Syiem baksana gipin sakgittam Independent candidate-rang baksa susaskaenga. Mawphlang by-election-oba Congress dolni candidate Kennedy C Khyriem, UDP-ni Eugeneson Lyngdoh aro NPP-ni Lamphrang Blah baksa susaskaenga.
