SHILLONG: Rajabala Assembly constituency baksa apsan ong·atanggipa Mawphlang aro Mawryngkneng by-election-ni result-rangkoba Mongolbar salo jinmana parakataha aro vote-rangko chamanani ja·man Mawphlang by-election-ko United Democratic Party (UDP)-ni candidate Eugeneson Lyngdoh aro Mawryngkneng by-election-ko National People’s Party (NPP)-ni candidate Pyniaid Sing Syiem cheangskaaha.
Mawphlang Assembly constituency-ni by-election-o robol kal·na changani gimin mingsing minggamako man·gipa aro UDP-ni candidate Eugeneson Lyngdoh 13,285 vote-rangko man·e, 8,884 vote-rangko man·rikgipa Congress dolni candidate Kennedy Khyriem-ko 4401 vote-rangchi cheaha.
Mawphlang by-election-o NPP-ni candidate Lamphrang Blah, 5103 vote-rangkosan man·rikskaaiaha.
Mawphlang constituency-o gimik sak 33,194 pu·ongiparang donga aro ianoni sak 27,474 pu·ongiparang dilgipako seokanio bakko ra·angahachim.
Indake ong·engon, Mawryngkneng Assembly constituency-ni by-election-oba NPP-ni candidate Pyniaid Sing Syiem 14,177 vote-rangko man·e, 12,361 vote-rangko man·rikgipa Congress dolni candidate Highlander Kharmalki-ko 1816 vote-rangchi cheangskaaha.
Mawryngkneng by-election-ni vote-rangko chananio dokgipa round-ona kingkingde NPP aro Congress candidate-rangni gisepo biltinggrikkuaiangachim indiba vote-rangko chanmanahaon Congress dolni candidate-ko NPP-ni candidate 1816 vote-rangchi chena man·aha.
Mawryngkneng constituency-ni gital seokako man·gipa MLA Pyniaid Sing Syiem, Mawryngkneng constituency-ni ning·o donggipa Sohryngkham KHADC constituency-ni MDC-ba ong·engachim ine nikna man·a.
Mawryngkneng Assembly constituency-o gimik 36,751 pu·ongiparang dongskaachim aro ianoni 75 percent, ia by-election-o pu·onahachim.
