SHILLONG: Meghalaya a·dokni by-election-ko ong·atanio United Democratic Party (UDP)-ni chu·sokgipa ong·aniara mikkangchi nambata salrangko nikna mesoksoani ong·enga ine UDP-ni president Metbah Lyngdoh parakataha.
Iani bidingo kobor ra·timgipa manderang baksa agangrikengon, Mawphlang by-election-ko bang·bea vote-rangchi chee Rajabala constituency-oba kraa gitan vote-rangko man·ahani gimin ian UDP-na namgipa chin ong·enga ine Lyngdoh parakataha.
“Mawphlang-o chingni candidate Eugeneson Lyngdoh, bang·bea vote-rangchi chegen ine chinga ka·dongsoengachim aro chingni ka·dongsoanirang kakket ong·ahani gimin anga namen kusi ong·a,” ine UDP-ni president aganaha.
Pu·onani salsa ja·man uamang 4000-na batgipa vote-rangchi chena hisapsoahachim ine janapatengon, ua (Eugeneson) Mawphlang constituency-ni dam 50 polling station-oni dam 40-o chena man·aha ine Lyngdoh parakataha.
Indake ong·engon, manderang UDP dolko jolni mongsonggipa dol ine ra·chakanichi aro Eugeneson-ara gitcham MLA SK Sunn sagini depante ong·anichiba ia by-election-o UDP altubeen chena gita man·aha ineba UDP-ni president parakataha.
Mawphlang-o UDP-ni chegipa ong·anina ua UDP-ni dilgiparangko, UDP-na kam ka·giparangko aro UDP-ni candidate-na rakbee campaign-rangko ka·e dakchakahani gimin HSPDP-ni dilgiparangkoba mittelpilangaha.
Rajabala constituency-ni gimin janapatskaengon, Rajabala-o UDP-ni candidate Ashahel D Shira chegipa ong·na man·jahaoba ian UDP-na namgipa chin ong·enga ine Lyngdoh parakataha.
“Rajabala-o chinga 7200 vote-rangko man·ahani gimin anga kusi ong·aia. Ua (Shira) Rajabala constituency-ni gimik dam 58 polling station-oni dam 18 polling station-ko chena man·aha aro gipin damgni polling station-oba ua 2 ba 3 vote-rangchisan ja·manchakrikaiaha,” ine UDP-ni president parakataha.
Rajabala-ni a·kawe jolrangoba UDP-ni dilgiparang, Shira-na nambate campaign ka·na man·genchimode ia by-election-o UDP nambate dakna man·naba gnangchim ineba Lyngdoh aganaha.
Indake ong·genchimoba, ia bilsini a·bachengachibara GHADC election-o UDP-ni dilgiparang rakbee kamrangko ka·ahani a·selsa Rajabala by-election-o uamang indita vote-rangko man·aha ine Lyngdoh a·kangatskaaha.
Garo Hills-ni pilak constituency-rangon UDP-ko bilakbatatna gita uamang rake kamrangko ka·gen ineba Lyngdoh parakataha.