SHILLONG: India a·song gimiko Meghalaya a·dokan petrol, diesel-rangoniko kajina ra·ani komibatgipa ong·engani gimin aro batanggimin chango petrol, diesel-rangni kajinako komiatani a·sel gong kror 100-na baten revenue ba a·dokna man·dapanio gimaataniko man·na nangengani gimin da·o petrol aro diesel-rangni kajinako komiataniara a·dok sorkarina altua kam ong·jawa ine Budbar salo a·dokni Chief Minister Conrad Sangma parakataha.
“Manderangni dabianiko man·e petrol aro diesel-rangni kajinako komiatani ja·man a·dok sorkari, gong kror 100-na baten revenue man·anio noksan ong·na gita nangaha. Uni gimin da·o petrol aro diesel-ni kajinako komiataniara chingna altua kam ong·jaenga,” ine Chief Minister parakataha.
Ia sal somoirango India a·song gimikon petrol aro diesel-ni damrang tang·dopretahani a·sel manderang neng·nikanirangko chagrongna nangtokengon, petrol-ni kajinako gong 5-chi aro diesel-ni kajinako gong 10-ni komiatna gita ma·mong sorkari tik ka·ahani gimin Chief Minister, ia kattarangko aganaha.
Chief Minister-ni aganani gitade, mitam a·dokrangode petrol aro diesel-ni kajinarangko 36 percent-ona kingking ra·enga indiba Meghalaya a·dokode iana baten kajinako komibate ra·engachim.
“Chinga bang·en korosrang ong·ahani gimin da·o maming ja·kurangko de·na man·kujaenga indiba iani bidingo maikai chinga ja·kuko de·na man·gen, uani bidingo chinga cholrangko niengakua,” ine Sangma aganaha.
Budbar salosan petrol aro diesel-ni kajinarangko komiatani bidingo Finance Ministry-oni jinmana u·iataniko on·angahachim ine nikna man·a.
“Bristibar sal dipet petrol-ni kajina-ko gong 5-chi aro diesel-ni kajinako gong 10-chi komiatna gita India sorkari tik ka·aha aro kajinarangko komiatengahani gimin damrang tang·onanggnok,” ine Finance Ministry parakataha.