TURA: A·chikrangni dal·batsranggipa maniani 100 Drums Wangala Festival ba dama bol 100-ko doke Wangala manianiko re·baenggipa November 11 tarikoni 13 tarikona Wangala A·dam Chibragre-o ong·atna siengani gimin ia biapo da·o kamrangko ka·chichatoksoengaha.
Kobor on·timgiparangni u·iatani gitade, ia dal·begipa manianiko sokachakna gita Hundred Drums Wangala Festival Committee (HDWFC) kamrangko rake ka·sotokengaha aro kamrang da·o matchotna gita siengaha.
Bilsi gimiko game ge·e man·gipa mi misina pattigipa ra·rongipa Misi Saljong-ko mittelpilani gita bilsiantian A·chikrang Wangala manianiko dakronga aro uandaken ia dama bol 100 doke Wangala manianiko batanggimin ru·uta bilsirangonin A·chikrang ku·cholsan ong·e manirongbaengachim.
Ia 100 Drums Wangala manianiko re·anggipa bilsionin Asanang-oniko apjitbae da·o bilsiantian Wangala A·dam Chibragre-o ong·atskaengahachim.
Ia chang 44-gipa 100 Drums Wangala maniani skanggipa sal, chong·motan November-ni 11 tariko Garo Hills Autonomous District Council (GHADC)-ni Chief Executive Membor (CEM) Benedic R Marak, mongsonggipa sokgipa ong·e bakko ra·anggen aro Handloom & Handicraft Exhibition-ko do·ga oe on·anggen.
Gnigipa salo, dingtang dingtang chrok mesaanirang baksana jatni kal·susaanirangko aro budu salgrikanirangkoba ong·atanggen. Gnigipa salo, Meghalaya Legislative Assembly-ni Speaker Metbah Lyngdoh, mongsonggipa sokgipa ong·e bakko ra·angskagen.
Ia apsan salon Rugala manianikoba dakangjolgen.
Bon·kamgipa salo Meghalaya a·dokni Chief Minister Conrad K Sangma, mongsonggipa sokgipa ong·e bakko ra·angskagen aro ia apsan salon, dol 10 Wangalgipa dolrangni chroksusaanirangko aro dol 10 apsan dama bol 100-ko dokeba Wangalanggen.
