TURA: Petrol aro diesel-ni kajinarangko ma·mong sorkarini komiatani ja·manoba Meghalaya sorkarini gita kajinarangko komiatskajaengani a·sel petrol aro diesel-ni damrang rakengkuani gimin sorkarini kosako jegale All Garo Hills Joint Action Committee (AGHJAC)-ni gita jinma tom·aniko Tura Super Market-ni auto parking lot-o ong·atangaha.
Ia tom·anio AGHJAC-ni dingtang dingtang dilgiparang, jinmana aganprakangengon, ma·mong sorkarini gita petrol-ni kajinako gong 5 aro diesel-ni kajinako gong 10 komiatani ja·man a·dok sorkarirangkoba nigrike kajinarangko komiatchina u·iatahachim indiba Meghalaya a·doko petrol aro diesel-ni kajinarangko komiatjaengani a·sel damrang tang·onjaenga ine an·tangtangni suk ong·gijaniko parakangtokaha.
Salgro salaramni gipin a·dokrangode petrol aro diesel-ni kajinarangko komiatahani a·sel mitam a·dokrangode da·o petrol-ni dam gong 95-mangona tang·onaha ine talatangengon, Meghalaya a·dokode petrol aro diesel-ni kajinarangko sorkari komiatjaengani a·selan bang·e komikujaenga ine AGHJAC-ni dilgiparang parakataha.
Petrol-ni kajinako gong 5/- aro diesel-ni kajinako gong 10/-chi ma·mong sorkarini komiatani ja·man Meghalaya a·doko da·o petrol-ni dam 99 aro diesel-ni dam gong 86-mangonasa tang·onengkuachim ine nikna man·a.
Indake ong·engon, salgro salaramni gipin a·dokrango gitan Meghalaya a·dokoba petrol aro diesel-ni kajinako komiatchina gita AGHJAC, a·dok sorkario dabiangenba, ia dabianiko knachakjagenchimode mikkangchi rakbate jingjengatanirangko dakanggen ine mikrakataniko on·angaha.
Batanggimin chango Meghalaya a·doko petrol aro diesel-ni kajinako komiataonin Meghalaya a·dok gong kror 100-na baten revenue-ko man·anio noksan ong·na gita nangenga ine talatangenba, da·o dipet Meghalaya a·doko petrol aro diesel-ni kajinarangko komiatna man·kujaenga ine adita salrangna skangsan Meghalaya a·dokni Chief Minister Conrad Sangma parakatahachim.
