TURA: Nigeria-ni mande Felix minggipa aro Naga me·chik saksa jemangkon skango Delhi Police aro East Garo Hills police nangrime cyber gita cha·boke cha·ani dosio a·songni skotongoniko rim·aha talbate sandina gita mija Sukrobar-o uamangko sal bongna police custody-o donangkuaha.
Naga me·chik jekon skango biming mingja Khegoli ine ma·sina gita East Garo Hills police man·aha.
East Garo Hills police-ni aganani gita, sakgniko sing·sandirokao uamangni parakani gita Jowai, Tura, Baghmara, Williamnagar, Ri-bhoi aro Nongstoin-ko man·chape a·doko bang·a manderangko uamang sakgni cha·bokaha. Sandie parakdapani gita Nigeria-ni mande un baksa kam ka·gipa bang·en denggu dol manderang donga.
“Chinga sandikuenga indiba chingni ma·siani gita ua Alex-Williams/Alex James-ni bimingo tol·e FB account kulia donga. Ua WhatsApp number-447398279773-ba donga jekon ua tol·e boksis aro bosturangko watatenga ine manderangko cha·bokna jakkalaha,” police u·iataha.
Indakgipa cha·bokgiparangna seng·china Police, social media jakkalgiparangko didie uamang dosi dakgipa tol·e account kuligiparangchi cha·boka man·ode sepangogipa police station-na kobor on·china uamangko mol·molaha.
