SHILLONG: Budbar salo nokdonggana sienggipa gital district ba a·jako ‘Eastern West Khasi Hills’ ine mingna sorkarini tik ka·aniko jolni NGO-rang jegalatenba, ia gital district-ko dingtang bimingchi mingchina dabiangtokaha.
Mairang civil sub-division-ko district songna gita re·anggipa November 5 tariko Meghalaya Cabinet ra·chakahachim aro ia gital district-ko ‘Eastern West Khasi Hills’ ine mingenba da·al Budbar salni bako a·dokni Chief Minister Conrad Sangma-ni jakchi nokdonggae on·angna siengahachim.
Indake ong·engon, ia gital district-ko Eastern West Khasi Hills ine mingna sorkarini tik ka·angani ja·man social media-rangoba manderangni jegalanirangko nikna man·aha aro uandaken jolni NGO-rangba ia gital district-ko gipin bimingchi mingskachina sorkariko didiataha.
Iani bidingo kobor ra·timgipa manderang baksa agangrikengon, “Mairang civil sub-division-ko district ong·atna rakbee kamrangko ka·dilahani gimin chinga Mairang-ni MLA Metbah Lyngdoh aro Nongstoin-ni MLA Brolding Nongsiej-ko mittelpilna ska indiba ia gital district-ko Eastern West Khasi Hills ine minganiara maming orto dongjaengani gimin chinga ia bimingni pal gipinko donskachina didienga,” ine Hynniewtrep Youth Council (HYC) Nongkhlaw circle-ni president Ebeljune Nongrang parakataha.
Ia gital district-na bimingko ku·pattie uamang joltangni MLA-na on·ataha ineba HYC parakataha.
