SHILLONG: Meghalaya a·dokni SSA skulrango skigiparangni dingtang dingtang dabianirangko a·dok sorkari chu·sokatna man·jaengani gimin Meghalaya a·doko donggipa dingtang dingtang a·jani SSA skigiparang Mongolbar salo Shillong songjinmani Jaiaw-o donggipa Students Field-o jinma tom·bimonganiko ong·atangaha.
Ia tom·bimonganiko Meghalaya SSA School Association (MSSASA) ong·ataha aro tom·bimonganio dingtang dingtang a·jani SSA skigiparang bakko ra·angtokaha.
Ia tom·bimonganio MSSASA-ni president Aristotle C Rymbai, jinmana aganprakengon, skigiparangni dabianirangko sorkari antignini gisepon chu·sokatna nanggen aro ia antignini gisepo skigiparangni dabianirangko chu·sokate on·na man·jagenchimode sorkarini kosako Meghalaya High Court-o ijahar ka·na draatako man·gen ine mikrakataniko on·angaha.
Meghalaya a·dokni Education Minister Lahkmen Rymbui-ni agangipa kattarangko jegalatengon, ua minister ong·e SSA skigiparangni neng·nikanirangko namatna man·jaenga ine nikenga ong·ode kamtangko waton nambatgipa ong·gen ine MSSASA-ni president parakataha.
SSA skigiparangna jabongani dormaharangko on·na man·jaengani gimin a·dok sorkariko sing·doangengon, “Ma·mong sorkarisa SSA skigiparangna tangka paisarangko on·atenga aro skigiparangna ma·mong sorkari dormaharangko on·telgen ine a·dok sorkari ka·dongbebeenga ong·ode tangkarangko ra·sroeba skigiparangna dormaharangko on·na man·achim aro ja·mano ma·mong sorkarini on·atgipa tangka paisarangchi grorangko chotskana man·achim,” ine Rymbai parakataha.
Skigiparang jabongani dormaharangko man·kujaengani a·sel bang·a neng·nikanirangkp chagrongna nangtokengaha ineba ua aganaha.
Meghalaya a·dokni SSA skulrango skigiparangko RTE Act 2009-o pangchake state implementation society-oniko Education department-ona apjitangskachina, a·dokni sak 12,541 SSA skigiparangni dormaharangko bariatchina aro jabongani dormaharangko changsano on·china gita MSSASA dabiengachim ine nikna man·a.
SSA skigiparangna jabongani dormaharangko on·kujaengani gimin All Garo Hills SSA School Teachers Association (AGHSSASTA)-ba, re·baenggipa December jao New Delhi-ona re·ange jingjengatskana manchiengachim ine nikna man·a.