SHILLONG: Meghalaya a·dokni pilak biaprangon maming mikkang niteani gri namroro silroroaniko ra·bachina gita Congress dol, a·dok sorkariko didiangaha.
“MLA-rang je political dolniba ong·china indiba pilak constituency-rangnan sorkari apsan dakgipa namroro silroroaniko on·na nanga. Badiaba constituency-o maiba namroro silroroani kamko ra·gatenga ong·ode uan a·dokni gam-jinsa ong·a aro ua constituency-ni MLA ba badiaba political dolnide ong·jaengani gimin sorkari, pilak constituency-nan apsan kamko dake on·na nanga,” ine Nongpoh-ni Congress MLA Mayralborn Syiem parakataha.
An·tangni agangipa kattarangna toe janapatengon, Nongpoh-ba damsa Ri Bhoi a·jani headquarter ong·genchimoba galchipako man·gipa biap gita ong·enga ine Syiem, ia jolrangoba pilakni gitan namroro silroroaniko ra·bachina sorkariko didiataha.
“Uni gimin pilak constituency-rangnan apsan nirokaniko on·china aro namroro silrorona cholko on·china gita anga sorkariko ba iandakgipa kamrangko jako ra·e ka·enggipa manderangkoba didienga,” ine Nongpoh-ni MLA aganaha.
Badiaba mandena ba badiaba constituency-na sorkarini mikkang nitee kam ka·aniko nikengama ine sing·on, “Anga iandakede aganjaenga indiba je sorkarioba apsan nangrimgipa dolrangnasa mikkang nichengronga. Iako dingtangatchina anga an·tangde nangnikenga,” ine Syiem aganaha.
A·dokna aro a·doko songdongenggipa manderangna kamko ka·engon, maming mikkang niteani grisa kamko ka·na nanga ineba Congress MLA aganaha.
