SHILLONG: NPP-ni dilenggipa MDA sorkari baksa bakrimgipa state BJP, ma·mong sorkarini project-rangko a·doko ra·gatanio kam ka·sinengani gimin jajrengako janapatenba a·dok sorkariko, man·a dipet ta·raken ma·mongni sheme-rangko ra·gatchina mol·molataha.
“Jal Jeevan mission aro gipin ma·mongni scheme-rangko dongimin somoio matchotatna nanggen ong·jaode a·dok sorkarina gimaani ong·gen. Maina project-rangko dongimin somoio matchotna man·ja ong·ode, tangkako watpilatna nanggen, ian a·dokna gimaani ong·gen, ine State BJP Chief Ernest Mawrie aganaha.
Indake ong·engon, BJP, ruling sorkario bakrimgipa ong·pae, ia mamlako Chief Minister-na u·iate on·aha. Da·ororode jakkalani ba kam ka·ani certificate-ko on·na man·jaode, ma·mong tangkako watjawa, ian nama ong·ja. A·doko ma·mongni scheme-rangko ra·gatanio kamrang namen ja·manchakenga. Sorkari kamkode ka·enga indiba kam ka·aniko ta·rakatna nangenga. Niatgenchimode, Jal Jeevan scheme-kosan ong·aija gipin scheme-rangkoba man·gopa, ine Mawrie agandapaha.
Ma·mong NDA sorkari baksa national aro State highway-na bang·bea project-rang donga aro PMGSY-ba donga. Indiba maini gimin sorkari ja·ku de·jaenga iani gimin u·ija. Rama-ja·langrangni obosta bilongen namja, iarangni gimin constituency-ni local representative aro sorkari, daitoko jako ra·e kam ka·gipa authority-na seate u·iatna nanga. Uandake Rajabala constituency-ni rama obosta namgijani giminba BJP, election campaign ka·mitingo janapangaha.
By poll campaign-ni somoio BJP, bang·a manderangonikon joltango rama namgija aro ma·mongni scheme-rangko ra·gatkujaengani gimin agananirangko knaaha ineba BJP-ni chief agandapaha.
Minggipin a·dokni manderangna sokgipa bang·a scheme-rangan scam-ona sokanga, jeni a·sel bang·a nokdangrangan scheme-ni namgniko man·tokja, ineba BJP janapataha.
