SHILLONG: District Rural Development Agency (DRDA)-rangko Autonomous District Council (ADC)-rang baksa ba a·dok sorkarini tik ka·gimin department-rang baksa chapatchina ge·etaniko Meghalaya a·dokode watchina didie Meghalaya sorkari, Rural Development Ministry baksa agangrikna sienga.
“Iani bidingo anga Chief Minister Conrad Sangma-ko gronge, ia niamko a·dokona nangatjachina didina gita unbaksa agangrikgen,” ine Robibar salo, Meghalaya a·dokni Rural Development Minister Hamletson Dohling parakataha.
Rural Development Minister-ni parakatani gitade, songadam nokadamrango namroro silroroani kamrangko ka·na gita DRDA-ko nangchongmotenga aro DRDA-ko ADC-rangona apjitangania altua kam ong·jawa.
“Ma·mong sorkarini on·gimin ia u·iataniko Meghalaya a·dokode ra·chakna gita namen neng·ani ong·enga. DRDA-rangko ADC-rangona apjitanggenchimode songadam nokadamrango namroro silroroani kamrangko ka·anio neng·nikanirangko chagrongna nanggnok,” ine Dohling aganaha.
Je a·dokrangon Zila Parishad ba Panchayati Raj-ko ja·rikachim, uandakgipa a·dokrangode ia ge·etaniko ja·rikanio maming nangchakeani ba neng·nikanikrang dongjawa indiba a·song gimikonde ia niamko ja·rikna man·jawa ine Rural Development Minister parakataha.
Ia niamko Meghalaya a·doko watchina mol·molaniko ma·mong sorkari jechakgenchimode somoiko on·dapskachina a·dok sorkari mol·molgen ineba Dohling parakataha.
“Ia kamko re·baenggipa 2022 bilsini April 1 tarikni gisepo matchotatna gitade a·dok sorkari man·kujawa aro ia kamko chu·sokatna gita chingna somoiko nangdapkugen,” ine Dohling aganaha.
Meghalaya a·doko MGNREGA baksana dingtang dingtang ma·mongni scheme-rangko DRDA-sa nirokengachim ine nikna man·a.
DRDA-rangko Zila Parishad ba Zila Panchayat-rang baksa chapatchina gita adita salrangna skangsan, Rural Development Ministry, u·iataniko on·angahachim ine nikna man·a. Indake ong·genchimoba, Panchayati Raj system donggijagipa Meghalaya aro uandakgipa a·dokrangkode DRDA-ko District Council ba a·dok sorkarini tik ka·e on·gipa department-rang baksa chapatskachina gita ma·mong sorkari u·iatahachim.