SHILLONG: Adita salrangna skang, Meghalaya a·dokni damgittam by-election-o Congress dolni amako man·aniara an·tangni dosan ine Meghalaya Pradesh Congress Committee (MPCC)-ni president Vincent H Pala a·kangatenba, re·baenggipa 2023 bilsini Assembly election-nade Congress dol gital dake kamko ka·gnok ine parakataha.
By-election-o dingtang dingtang dolrang, tangka paisarangchi vote-rangko salaha ineba Pala matnangataha.
“By-election-o amako man·anina anga dosko ra·enga. By-election-o chena gita chinga rakbee kamrangko ka·ahachim indiba manderang chingna pu·onjaha. Tangka paisarangko sualani a·selsa ia pilakan ong·aha,” ine Sombar salo Pala, kobor ra·timgiparangna parakataha.
Indake ong·genchimoba, ia by-election-o Congress dol skangona bate vote-rangko man·aha ineba MPCC-ni president a·kangataha.
“Manderang NPP-chi dilenggipa MDA sorkarini kamrango suk ong·tokjaenga ine chinga ma·sia aro uamang bilona re·bapilna neng·ani ong·gnok. Chinga da·o gital cholrangko tarie kamko ka·gnok aro re·baenggipa salrango Congress dolko bilakbatatna gita pilak membor-rangkon rakbate kam ka·china didignok,” ine Pala aganaha.
A·dokni gitcham chief minister aro Congress dolni dilgipa Mukul Sangma, Congress dolko wate katna miksongenga ine agananikoba ua raken jegalattaiaha.
“Election-ni somoirango Opposition dolko dilgipa ong·e uni rakbee kam ka·aniko anga nikaha. Ua pangnan an·tangni miksonganirangko ma·sigipa ong·e pangnan doltang baksa agangrikronggipasa ong·a,” ine MPCC-ni president aganaha.