SHILLONG: Meghalaya a·dokni deficit skulrango skigiparangni dingtang dingtang dabianirangko apsan chanchirimna okamatako man·enba, Sombar salo Khasi Jaintia Deficit School Teachers Association (KJDSTA) aro Garo Hills Deficit School Teachers & Employees Association (GHDSTEA)-ni dilgiparang, Meghalaya a·dokni Chief Secretary RV Suchiang, Principal Secretary DP Wahlang aro Education department-ni dingtang dingtang officer-rang baksa apsan asonge chanchirimangaha.
Ia tom·a matchotani ja·mano kobor ra·timgipa manderang baksa agangrikengon, deficit skulrango skigiparangnaba kamoni neng·takangani ja·man man·gnirangko on·china, death-cum-retirement gratuity-ko 5th Pay Commission-ni recommend ka·ani gita gong lak 3.5-oniko gong lak 10-ona bariatchina, gital pay scale-ni bangki arrear-rangko on·china, medical reimbursment-ko on·china aro commission-ni recommendation-ko deficit skigiparangnaba on·china gita ia tom·anio KJDSTA aro GHDSTEA-ni dilgiparang sorkari baksa agangrikaha ine KJDSTA-ni president Babu Kular Khongjirem parakataha.
“Ia dabianirangara deficit skulrango skigiparangni man·na nangenggiparangan ong·a aro chingni dabianirangko sorkari niatna ku·rachakaha,” ineba tom·a matchotani ja·man KJDSTA aro GHDSTEA-ni dilgiparang parakataha.
Skigiparangni dabianirangko sorkarini knachakjaengani gimin ia bilsini March jaoba deficit skulrango skigiparang, salgittamna chutti ra·gope jingjengatangahachim ine nikna man·a.
Deficit skulrango skigiparangni dabianirangko man·e adita salrangna skangsan a·dok sorkari, deficit skulrango skigiparang baksa apsan agangrikna gita okamatskaaha.