TURA: Batanggimin sal somoirango dongimin apsan niamrangko ja·rike West Garo Hills a·jao November 15 tarikoni re·baenggipa November 22 tarikona, dingtang dingtang niamrangko ra·gatangkuaha ine West Garo Hills a·jani Additional District Magistrate CN Sangma u·iataha.
Additional District Magistrate-ni u·iatani gitade, West Garo Hills a·ja gimikon dokkanrangko Sombar saloni Sonibar salona kingking walni 9:00 bajiona kuliangna man·gnok aro manderangko salruraenggipa garirangba chu·gimik manderangko gate salna man·gnok.
Sorkari office-rangkoba skango ka·a gitan da·o chu·gimik kam ka·giparang baksa pring 10:00 bajioni attam 5:00 bajiona ka·anggnok.
Indake ong·genchimoba, walni 11:00 bajioni pring 5:00 bajionade corona curfew ong·engkuani gimin West Garo Hills a·ja gimikon ia somoirangode manderangni skatang re·ruraanirangko champengatanggen ine West Garo Hills a·jani Additional District Magistrate parakataha.