SHILLONG: Meghalaya a·doko Congress dolni dilgiparangna aro mongsongbate Opposition dolni dilgipa Mukul Sangma aro MPCC-ni president Vincent H Pala-na National People’s Party (NPP)-ni do·gako oe donenga ine Mongolbar salo NPP-ni state president aro Rajya Sabha-ni MP Dr WR Kharlukhi parakataha.
Congress dolni dilgiparangko NPP rimchaksona kusi ong·aigenma ine sing·anina aganchakaniko on·angengon, “Chingode bobilrang dongja indiba politics-ni gita susaskagiparangsan dongaia. Chinga Dr Mukul Sangma, Vincent Pala ba jekoba chingona re·baenggiparangkode rimchaksona kusi ong·aigen,” ine Kharlukhi parakataha.
Opposition Congress doloni NPP-o napna jotton ka·enggiparang dongama ine sing·anina aganchakaniko on·angskaengon, da·o dipet Congress doloni NPP-o napna jotton ka·giparang dongja indiba uamang NPP-ni niamrangko ra·chake re·bana sikenga ong·ode uamangna do·gako oe donenga ine NPP-ni state president parakataha.
“Chinga NPP-ko dal·rorochina nangnikenga aro Congress dolna agreba gipin dolrangoni saoba chingni niam aro miksonganirangko ra·chake re·baenga ong·ode chinga uamang pilakkon rimchaksona kusi ong·aigen,” ine Kharlukhi aganaha.
NPP, Congress dol baksa bakrimani cholrang dongama ine sing·on, “Da·o dipet chinga Congress baksa bakrimna chanchianirang dongkuja. Chinga ching baksa bakrimenggipa dolrang baksa kusi ong·aienga aro indaken chinga dongangkuaigen,” ine Kharlukhi aganaha.
2023 bilsini Meghalaya Assembly election-na Trinamool Congress (TMC)-ba a·doko kamrangko ka·soengaha ine koborrangko man·soenggipani bidingo janapatengon, ia susaanio pilakan bakko ra·na man·aia aro NPP dolde je dol baksaba susagrikna kusi ong·aigen ine NPP-ni state president parakataha.
