SHILLONG: Assam aro Meghalaya a·dokni simarango meligrikna man·jaenggipa biaprangko namatna gita a·dok damgnini kam ka·anio agre sikkele kamrangko ka·enga ine Mongolbar salo, Congress dolni MLA Ampareen Lyngdoh matnangatenba, Meghalaya a·dokde mamingkoba on·ani aro ra·pilani dongja ine parakataha.
Mongolbar salo, Assam aro Meghalaya a·dokni Chief Minister-rang, ia a·dok damgnini simarango meligrikna man·jaenggipa biaprangoni Langpih-ona re·ange songni manderang baksa agangrikahani gimin Lyngdoh, ia kattarangko janapataha.
Lyngdoh-ni parakatani gitade, Congress sorkarini somoirangoba uamang ia a·dok damgnini simarango meligrikgijanirangko namatna raken kamrangko ka·ahachim indiba kamrangko chu·sokatchipatna man·jahachim.
“Meghalaya a·dokde Assam-na mamingkoba on·na nangani aro ra·pilna nangani katta dongja ine a·bachengonin chinga aganmanaha aro a·dok damgnini simarango meligrikgijanirangko chingaba sorkariko chalaiengmiting somoion namatna jotton ka·ahachim. Indita bilsirangna namatchipna man·jaenggipa kamko ia sorkari dikdiksani gisepo namatna chanchiengama?” ine Congress MLA sing·doangenba, a·dok damgnini chief minister-rang, maiba ong·gija miksonganiosa ia meligrikgijaniko namatna ta·rake kamko ka·engakon ine an·tangni jajrengchakenganiko parakataha.