SHILLONG: Re·anggipa Mongolbar salo, Assam aro Meghalaya a·dok damgni chief minister-rang, Langpih-ona re·ange jinma tom·bimonganiko ong·atanio Langpih-ni bimingko ‘Lumpi’ ine banner-rango seahani gimin Meghalaya a·dokni Opposition Congress dol raken jegalataha.
“Ia songkode Langpih inesa mingachim indiba uamangni ‘Lumpi’ ine seaniara uamangni gronganio pakwate on·na a·bachenganiko mesokanisa ong·engaha,” ine Congress dolni dilgipa Ampareen Lyngdoh parakataha.
Langpih-ni bimingko sesretani bidingo tom·anio bak ra·giparangna talate on·ahama ine a·dokni Chief Minister Conrad Sangma-ko sing·doangengon, ia bimingko sesretaniara dolgni dilgiparangni sikkele kam ka·anio ong·gija miksonganirangko mesokani gitaba ong·enga ine Lyngdoh parakataha.
“Chief minister sakgnini Langpih-ona re·angani program gimikkon Assam-sa ra·gopaha ong·ode uamangan an·ching a·dokni pilakkon ra·gopna siengani gita ong·enga. Uamangni iandakgipa kamchi bang·gija manderangsan namgniko man·rikaigen. A·dok damgnini gisepo meligrikna man·jaenggipa dam 12 biaprangni bidingo am·sandianirangko regional committee-rang, November 30 tarikni gisepon sorkarina on·na siengani gimin ia report-ko jinmana u·iatchina ia jolrango songdongenggipa manderang dabina nangchongmota,” ine Congress MLA aganaha.
Jolo songdongenggipa manderangni agan-ku·pattianirangko jegaljachina gita MDA sorkariko didiangengon, Mongolbar salo ong·atanggipa program-o Langpih-ni bimingko bang·bata poster-rangon sesretaha aro ian Meghalaya a·doko songdongenggipa manderangnade ra·chakna man·gijani ong·enga ine Lyngdoh parakataha.
Meghalaya aro Assam a·dok damgnini simarango ru·uta bilsirangonin meligrikna gita man·jaengon, ia meligrikna man·jaenggipa biaprangoni Langpih songona re·anggipa Mongolbar salo, Meghalaya a·dokni Chief Minister Conrad Sangma aro Assam-ni Chief Minister Himanta Biswa Sarma apsan re·ange, jolo songdongenggipa manderang baksa tom·aniko ong·atangahachim.
