TURA: Bangladesh a·songona palsrukatna miksonge Jengal, Chiading rama gita matchu salangenggipa gari bolgniko Budbar walo, East Garo Hills a·jani dingtang dingtang NGO-rang, Chiading police station-ni ning·o donggipa biap damsao rim·rikaha ine kobor on·aha.
Iani bidingo NGO-rangni, Chiading police station-ni officer-in-charge-na FIR ka·doangani gitade, Budbar walo AS-01MC 1392 aro AS-18C 9727 garirango matchurangko gapchippile, Williamnagar rama gita salangengachim indiba ja·mano NGO-rang ia gari bolgniko ua biapo rim·sona gita man·aha.
Ia garirango, matchurangko salna gita Regional Transport Officer-ni see on·gipa licence-rang dongjachim aro matchurangko ku·sikrango aro ja·arango kachapesa salengengani gimin ian Prevention of Cruelty to Animals Act 1960-ni ning·o on·gimin niamrangko pe·ani gita ong·achim ineba NGO-rang parakataha.
Indake ong·engon, ia rama gita matchu badingsrukaniko name nirok sandichina gitaba NGO-rang dabiangaha.