TURA: Tura-oni adita chel·ao donggipa Babadamgre songo salgittamna ong·atenggipa Me·gong Festival-ko Bristibar salo, a·dokni Chief Minister Conrad Sangma, a·bachengate on·angaha aro ia manianiko a·bachengate on·angani somoio North Tura-ni MLA Thomas A Sangma, Williamnagar-ni MLA Marcuise Marak, dingtang dingtang official-rang aro dilgiparangba dongpae bak ra·angaha.
Ia Me·gong Festival-ko ong·atanio Meghalaya a·dokni dingtang dingtang jatrang baksana Arunachal Pradesh, Sikkim aro Assam a·dokrangoniba re·bae bakko ra·tokenga aro jattangtangni cha·ani ringanirang baksana daka rikanirangkoba mesokenga.
Ia Me·gong Festival-ko a·bachengate on·angani somoio a·dokni Chief Minister, jinmana aganprakangengon, Chidekgre-o rikenggipa Tribal Research Institute (TRI)-ko re·baenggipa 2022 bilsini September 1 tarikode nokdonggae on·angna siengahani gimin ia Me·gong Festival-koba mikkang bilsionide ia Institute campus-on dal·bate ong·atangskagnok ine parakataha.
Ia Me·gong Festival ba manianiara Meghalaya a·dokni bilsi 50 gapaniko aro India a·songni jakgitelaoni bilsi 75 gapaniko maniani bak gita ong·enga ineba Chief Minister parakataha.
Me·gong Festival-ko ong·atanichi Tourism department, Garo Hills-ni nitoaniko aro rotogipa ong·aniko mesokenga ine janapatengon, COVID-19 giproroani a·sel a·doko Tourism-ni kamrang bon·chongdikatako man·ahachim indiba da·o COVID-19-ni giproroani adita komiangahani gimin a·dok sorkari, dingtang dingtang program-rangko ong·ate tourism-ko tangatpilna aro gipin biaprangoni manderangko a·dokona salbapiltaina tik ka·aha ine Sangma parakataha.
Meghalaya a·dokni bilsi 50 gapaniko maniani bak gita dingtang dingtang program-rangko ong·atangkugen aro re·baenggipa 2022 bilsini January 21 tariko dal·bee tom·bimonganiko ong·atenba ia manianiko matchotatgen ineba Chief Minister parakataha.
Iana skang, ua dingtangmancha ‘Meghalaya at 50’ ine bimingko done a·dokni bilsi 50 gapaniko manina tarisogimin logo-koba jinmani mikkango oprake on·angaha.
Ia Me·gong Festival-ni skanggipa salo Wangala chrokani, jatni kal·susaani, jal·lik aro ta·bolchu cha·susaani, chu tarisusaani, circus, Ruga chrokani, bilak wa·sagipa mandena susaani, Jaintiarangni chrokani, fashion show, chasong gitalo chrokani, lazer & light show aro rock concert-rangko ong·atangaha.
