BAGHMARA: India a·song gimiko South Garo Hills a·jaba COVID-19-ni tikako su·anio komibatsranggipa a·jarangoni damsa ong·engani gimin a·jao songdongenggipa pilak manderangkon tika su·e on·na man·na gita November-ni 19 aro 20 tarikrango, salgnina South Garo Hills a·jani damgittam constituency-ni ning·o donggipa pilak polling station-rangon dingtangmancha tika su·ani program-ko ong·atenga ine South Garo Hills a·jani Deputy Commissioner FM Dopth u·iataha.
Ia salgnina COVID-ni tikarangko su·e on·anio dingtangmancha Aadhar-na biming segatani aro Electoral roll-rango biming segatanikoba apsan ong·atjolenga ine kobor on·aha.
Uandaken, bilsi 18 batgimin manderang, jemangan COVID-ni tikarangko su·e ra·tokkujachim aro Aadhar-na bimingtangtangko segatkujaengachim, an·tangtangni sepangbatgipa polling station-rangona re·ange, tikarangko su·e ra·china aro Aadhar-na bimingtangtangko segatchina gita South Garo Hills a·jani Deputy Commissioner didiataha.