SHILLONG: Meghalaya a·dokni Samagra Shiksha Abhiyan (SSA) skulrango skigiparangna chu·gimik dormaharangko on·na man·na gita tangka paisarangko on·dapatchina a·dok sorkari, ma·mong sorkari baksa agangrikenga ine a·dokni Chief Minister Conrad Sangma parakataha.
“Tangka paisarangko watdapatchina chinga India sorkari baksa agangrikenga aro tangka paisarang sokbadapahaon chinga SSA skigiparangna dormaharangko chu·gimik on·na man·gnok. Mikkangchiba chinga apsan daken skigiparangni dormaharangko on·angkugen,” ine Chief Minister, kobor ra·timgiparangna aganaha.
Meghalaya a·doknasan ong·aigija pilak a·dokrangnan ma·mong sorkari, tangka paisarangko watningjahani a·selan skigiparangna dormaharangko on·ningna man·jaha ine talataniko on·angtaiengon, pilak a·dokrangon SSA skigiparang an·tangtangni dormaharangko man·tokkujaenga indiba adita salrangna skangsan Meghalaya aro mitam a·dokrangde mitam bakrangko man·soaha aro bang·bata a·dokrangan da·ona kingkingba tangka pelsakoba man·sotokkujaenga ine Chief Minister parakataha.
“Skigiparangni neng·nikanirangko chinga ma·sichakenga indiba ian Meghalaya a·dokosan ong·enga ong·ja indiba a·song gimikon apsan dakgipa neng·nikanirangko chagrongna nangtokenga. Chinga man·a dipet cholrangko sandie SSA skigiparangna dakchakanirangko on·na jotton ka·gen ine anga ku·rachakaniko on·na nangnikenga,” ine Sangma aganaha.
SSA skigiparangni dormaharangko on·na gita a·dok sorkari, gong kror 140-ko ma·mong sorkarioniko bi·atahaoba adita salrangna skang, gong kror 59 tangkarangkosan a·dok sorkari man·soaiahachim.
Ia gong kror 59 tangkarangchi SSA skigiparangna sorkari, jagnini dormaharangko on·na tik ka·ahaoba mitam skigiparangde jagni jagittamni dormaharangko ra·chakna jechakskae chu·gimikkosa on·china dabitokskaengachim.
SSA skigiparangni kamko regularise ka·china dabienggipani bidingo janapatskaengon, SSA program-ko India sorkari, dingtang dingtang skulrang donggijagipa biaprango ra·gate, 90 percent tangka paisarangko dakchake on·engani gimin kamrangko regularise ka·aniara a·dok sorkarini bilo ong·ja ine Chief Minister parakataha.
Indake ong·genchimoba SSA program-o India sorkari kamrangko regularise ka·e tangka paisarangko dakchake on·angkugen ine a·dok sorkarina u·iatgenchimode, iako a·dok sorkari jako ra·na man·aigen ineba Sangma parakataha.
