TURA: Re·baenggipa 2022 bilsini January 21 tariko Meghalaya a·dokni bilsi 50 gapaniko manina siengani gimin ia manianiona India a·songni Prime Minister Narendra Modi-ko re·bae bakko ra·echina gita okamataha ine Meghalaya a·dokni Chief Minister Conrad Sangma, Babadam-o salgittamna ong·atenggipa Me·gong Festival-ko do·ga oe on·angani somoio jinmana parakataha.
“An·chingni a·dok bilsi 50 gapengahani gimin ia manianiona chinga a·songni Prime Minister Narendra Modi-koba re·bae bak ra·echina okamataha. Da·o dipet chinga iani bidingo Prime Minister-ni Office (PMO)-oni aganchakanina sengengkua,” ine Chief Minister parakataha.
Ia Me·gong Festival-an Meghalaya a·dokni bilsi 50 gapaniko aro India a·songni jakgitelko man·aoni bilsi 75 gapaniko manichakatani gita ong·enga ineba Chief Minister parakataha.
Chief Minister-ni aganani gitade, ia Babadam songara dingtangmancha jatni daka rikaniko rakkienggipa song ong·ani gimin a·dokni bilsi 50 gapaniko manichakatna gita namgipa biap ong·aha.
Meghalaya a·dokni golden jubilee-ko maniani bak gita mongsonggipa minggittam program-rangko ong·atanggen ineba Chief Minister parakataha.
“A·dokni bilsi 50 gapaniko manianio chinga North East Youth Festival, National Table Tennis Tournament aro North East Cup-ko sokachakgen,” ine Chief Minister aganenba, mikkang bilsio tik ka·sogimin gitan Meghalaya Games-koba ong·atanggen ine parakataha.