SHILLONG: North Garo Hills a·jaona rel gariko ra·anganichi jolni manderang namgnirangko man·enga ong·ode Byrnihat-onaba komibeoba bostu salgipa rel garikode ra·bana on·na nanga ine Sukrobar salo, BJP-ni state president Ernest Mawrie chakpaaniko parakataha.
Batanggimin chang Meghalaya a·doko BJP-ko dilenggipa manderangni tom·e chanchirimanion Byrnihat-ona bostu salgipa rel garina agrede ra·napbana man·jawa ine tik ka·aha ine janapatengon, ma·mong sorkarini gita rel ramarangko sandie salani ja·mansa Mendipathar railway station-ko a·songni Prime Minister Narendra Modi a·bachengate on·angaha ine Mawrie parakataha.
“Mendipathar-ona da·o rel gariko ra·angahani a·selsa Garo Hills-ni bading chiwalgiparang, da·o pringni Guwahati-ona re·ange an·tangtangni bosturangko palna sim·na man·e skangona bate kamaina cholrangko man·enga aro uamang attamon noktangtangona re·angpilna man·enga,” ine BJP-ni state president parakataha.
Garo Hills-ba Meghalaya a·dokni bakan ong·e rel garini namgnirangko man·enga ong·ode gipin biaprango songdongenggipa manderang aro mongsongbate game ge·e aro bading chiwale cha·giparangba namgnirangko man·na nanga ineba Mawrie aganaha.
“Meghalaya a·doko an·ching nangchongmotgipa bosturangni dam tang·doengani gimin jegaltokenga indiba iandake bosturangni dam tang·doaniko namatna aro manderangni neng·nikanirangko namatna gitade komibeoba bostu salgipa rel garirangko nangenga,” ine ua aganaha.
Rel garirangko ra·bana skang niam gri napsrukanirangko champengna rakgipa niamrangko ra·gatchengna nanga ine NGO-rangni dabienggipani bidingo janapatengon, NGO-rangni kenchakaniba ong·a ine niamrangko ra·gatchina gita BJP, a·dok sorkarina pakwate on·angaha.
Meghalaya a·doko Inner Line Permit (ILP)-ko ra·gatchina dabienggipani bidingo a·dokni BJP dol, ma·mong baksa agangriktaigen ineba BJP-ni state president parakataha.
