SHILLONG: Khasi aro Garo ku·sikrangkoba Constitution-ni Eighth Schedule-o ra·gatchina gita a·doko songdongenggipa manderang dabitokengani gimin ia dabianiko chu·sokatchina gita Robibar salo, a·dokni Chief Minister Conrad K Sangma, Union Education Minister Dharmendra Pradhan-ko didiataha.
Mawdiangdiang-ni Shillong Centre-o Central Institute of Hindi-ko kulie on·angani ja·man jinma tom·aniko ong·atanio a·dokni Chief Minister, jinmana aganprakangengon, re·baenggipa bilsion Meghalaya a·dokni bilsi 50 gapaniko manina siengani gimin Khasi aro Garo ku·sikrangko Constitution-ni Eighth Schedule ning·o ra·gatchina dabianiko ma·mong sorkari chu·sokate on·genchimode, ian a·dokni manderangna dal·batsranggipa boksis gita ong·genchim ine parakataha.
Meghalaya a·dokni Khasi aro Garo ku·sikrangko Eighth Schedule-o ra·gatchina dabienggipani bidingo ua a·songni Prime Minister Narendra Modi aro Union Home Minister Amit Shah-ni mikkangoba janapmanahachim ine talatangengon, iani bidingo Meghalaya Legislative Assembly-ni gitaba resolution-ko pass ka·manaha ine Chief Minister parakataha.
Ia ku·sik minggniko Eighth Schedule-ni ning·o ra·gatna nangchongmotgipa niamrangko chu·sokate on·na a·dok sorkari tarimanaha ineba Chief Minister parakataha.