SHILLONG: Assam aro Meghalaya a·dok damgnini sima ariogipa Assam Kamrup district-ni, sima arini bidingo golmal gnanggipa songrangona A·dok damgnini dolsa minister-rangni dol Mongolbaro apsan re·angenba nieaha.
Official koboro parakatani gitade, Minister-rang baksa, a·dok damgnichinin MLA-rang, dal·batgipa civil aro police official-rangba, a·dok damgnini a·kanggrikenggipa songrangona re·ange nianio re·angchapaha aro songni nokni manderang baksa agangrikangaha.
Assam delegation-ko Water Resources Minister Pijush Hazarika re·dilbaa, jeon Meghalayani delegation-ko Deputy Chief Minister Prestone Tynsong skotong ong·e re·dilangaha.
Assam-Meghalaya delegation-rang, mijalo Kamrup jologipa Jimirgaon, Bakhalapara, Lungkhung, Patgaon aro Bandhapara aro gipin songrangona re·ange, songni-nokni manderangko grongenba uamangni nangnikanirangko sing·e-sane ra·angaha.
Koboro gita re·anggipa delegation-rang, songni manderang, dilgiparangko grongaha aro uamangna a·selrangko talate on·an baksa uamangni chanchianirangko sing·e ra·baaha, jerangkon Hazarika aro Tynsong mang uamangni chief minister-tangtangna tale on·angskagen.
Hazarika baksa, Kamrup Deputy Commissioner in-charge Kailash Kartik N aro Superintendent of Police Hitesh Chandra Rai re·chapangaha, jeon Tynsong baksa Meghalaya-ni Transport Minister Dasakhiatbha Lamare, Jirang aro Nongpoh constituency-rangni MLA-rang aro Ri Bhoi district-ni deputy commissioner re·angchapaha.
Ru·uta bilsirangna tik ka·grikna man·gijagipa Assam-Meghalaya-ni sima arirangko tik ka·grikna gita a·dok damgnian paltangtang gita committee-rang songahachim. Assam-Meghalaya a·dok damgnini sima ario, sima tik ka·grikna man·gija dongenggipa gimikchi dam 12 biaprang donga.
