Cong-ni sak 12 MLA-rang Trinamool Congress-o napskana miksongenga

Nongpoh: India-na rakkigipa Japan-ni Ambassador, Suzuki Satoshi, mijal Butbar-o uni gita Civil Hospital Nongpoh-o songgipa Oxygen Plant-ko nieaha aro project-ko namedake dakahanina kusi ong·aniko janapaha.
Ua Nongpoh Civil Hospital-o songgipa oxygen plant-ko India aro Meghalaya sorkari baksa nangrime United Nation Development Programme (UNDP)-ni gita Japan sorkari dakchakaha. Ua oxygen plant, hospital-o sagiparangni oxygen-ko tanggitik nanganina 150 litres per minute (LPM)-ona bikotna man·gen.
Satoshi, Meghalaya-ni Health and Family Welfare-ni Minister, James Pangsang Kongkal Sangma, Directorate of Health Services (MI)-ni Director Dr Aman Warr, Dr PN Chyne, Medical Superintendent Nongpoh Civil Hospital-ni aro gipinrang baksa re·angpaaha.
Hopital-ona uni gita re·ange nieanina aro jean hospital-o namgni ong·gnigipa oxygen bikotani karkanako songanio namgipa aro chu·sokaniko nike Suzuki Satoshi an·tangni kusi ong·aniko janapaha.
A·songo aro Meghalaya a·doko jeon dal·begipa neng·nikaniko man·aha ua Covid-19 sabisini neng·nikani somaimitingo ripeng gita ua karkana Japan-ni manderangoni namgipa chin mingsa ong·aha, ua aganaha.
Project-ni chu·sokanina kusi ong·e, ua dal·begipa oxygen-ko bikotani karkana Meghalaya aro gipin a·jolrangni bang·a manderangna jeba sabisini kosako chena chol aro dakchakani ong·gen aro ua India aro Japan-ni ramramgipa chanchiani ong·e bilsirango sabisiko chena neng·nikanirangko warachakna mongsonggipa hospital-rangni bilko uandake sana-banani a·bakkuko a·pal-bilakbatatgen, Satoshi aganaha. A·dok aro a·songna Japan dakchakangkugen aro iani bidingo ku·cholsan kamko ka·gen, ua ka·dongataha.
Indake ong·engon, Meghalaya-ni Health and Family Welfare Minister, James Pangsang Kongkal Sangma, India-ona watatako man·gipa Japan-ni Ambassador-ko rimchaksoani kattako aganao, uni Excellency Suzuki Satoshi aro uni dolko Meghalaya a·dokona uni re·baanina mitelaha.
Covid-19 sabisi dal·begipa ra·bianiko ong·ataha aro Meghalaya a·doknasan ong·aigija a·gilsakna ong·aha jeon health department, officer-rang aro an·pachake kamko ka·giparang an·tangtangko on·kange ra·bianiko warachakna sakantian krengaha ia neng·nikani somaimitingo jemangan chingni ripeng chongmot ong·aha chinga uamangko ma·sichakchongmota ine ua aganaha.
‘Ua rakbegipa somaimitingo sorkari aro Japan-ni manderang UNDP baksa India sorkariko dingtangmancha Meghalaya a·dokna dakchakna re·mikkangaha jenan a·dok Japan-ni Embassy-na gro nangaha, Sangma aganaha.
Ua neng·nikani somaimitingo oxygen-ko supply ka·anian dal·begipa chanchiani ong·achim indiba Meghalaya a·dok rasong gnangbeaha maina Japan sorkarini aro UNDP aro gipin ripengrang gita agency-rangni dakchakaniko man·aha, ua aganaha.