TURA: 2020 aro 2021 bilsirango COVID-19-ni a·sel UPSC baksana ma·mong sorkarini Group A, B aro C service porikkarangko segiparang name dakna man·tokjaha ine North East Students Organisation (NESO) parakatenba, ia bilsignini gisepo porikka see da·o sepiltaina chol ong·jaenggipa chatro chatrirangnaba re·baenggipa 2022 bilsio ia porikkarangko sepiltaina cholko on·china gita ma·mong sorkariko didiataha.
Ia NESO dolara, salgro salaram a·dokrango donggipa dingtang dingtang chatro chatrirangni dolrang, chong·motan KSU, AASU, GSU, AAPSU, NSF, AMSU, MZP aro TSF dolrangni nangrime bikotskagipa dol ong·achim ine nikna man·a.
Indake ong·engon, 2020 aro 2021 bilsirango COVID-19-ni a·sel UPSC aro uandakgipa ma·mong sorkarini dingtang dingtang porikkarangko seanio chu·sokna man·pagijagipa chatro chatrirangnaba re·baenggipa 2022 bilsio ia porikkarangko sepiltaina cholko on·china gita didie NESO, Union Home Minister Amit Shah-na sedoataha.
NESO-ni parakatani gitade, 2020 aro 2021 bilsirango COVID-19 sajinmani a·sel a·gilsak gimikon neng·nikanirangko chagrongna nangtokahani gimin 2020 bilsio bon·kame ia porikkarangko sena chol ong·gipa chatro chatrirangna bilsigniko on·dape 2022 bilsio sepiltaina cholko on·na nanga aro apsan daken 2021 bilsio bon·kame ia porikkarangko sena chol ong·gipa chatro chatrirangnaba 2022 bilsio sepiltaina gita cholko on·na nangenga.
“Uni gimin COVID-19 sajinmako hisape 2020 aro 2021 bilsirango ia porikkarangko seanio chu·sokna man·gijagipa chatro chatrirangna dingtangmancha cholko on·taie 2022 bilsio ia porikkarangko sepiltaina on·china chinga mol·molenga,” ine NESO-ni dilgiparang, Union Home Minister-na sedoatgipa chittio parakataha.