SHILLONG: AITMC-ni sak 12 MLA-rang 2023 Assembly poll-o susaenba chena ka·dongenga aro sorkariko rikna manchisoenga, indiba a·doko skang somoirangoni dongsogipa political party-rang, AITMC-ni a·doko napanina jajrengja aro 2023 Assembly poll-o susaanio gital party-na kenani dongja ine aganskaenga.
NPP State President, WR Kharlukhi, AITMC-ni state politics-o napani gimin aganatengon, indine aganaha, “beben AITMC Meghalaya-o gital party ong·a aro election-o chena ka·dongsoenga, indiba politics-ode jekoba nikjumangna man·a, iako dakgen uko dakgen ine ku·chakaigen indimangba chongmot porikkade 2023-osan ong·gen. Ua somoio result-ko nikna man·aigen. Bilsi 2023 ja·man badita sak TMC-o dongrikkugen, iasa kattade, maina je political party-nan gital re·bae susaaniara ramram katta ong·ja ba altua ong·ja. Chingni party-ko Garo-rangni party inesa u·itokachim, indiba ia chanchianiko bon·atna bilsi 20 baten nangaha. Meghalaya-o bilsi 2023-ode NPP-ni mongsonggipa ra·bianide Congress baksasan ong·aigen.”
Minggipin Congress, UP election-o sak 100 MLA-rangko man·genchimode, Congress, gital party ong·skagen ine Kharlukhi aganaha.
Uandake BJP Meghalaya in charge, M Chuba Ao-ba Congress-ko matnangatengon, ‘Congress baksa permanent president-an dongja, mikkangchi uamangni mamin nisan dongja ine u·ienba TMC baksa bakrimaha’ ine aganaha.
Gimik political party-an election-o susana bil donga, AITMC haida Meghalaya-o ge·sade seat-ko man·aba donga ine BJP-ni dilgipa agankuaha.
Indake ong·engon United Democratic Party (UDP)-ni General Secretary, Jemino Mawthoh-ba indine aganaha, “political party-o an·tangtangni agenda donga indiba manderang seng·giparang ong·a, badia party manderangni namgnina kam ka·a, iako manderang mikrontangchin nika.”
