SHILLONG: A·gilsak gimikon da·ororo COVID-19-ni gital ‘Omicron’ rokomko nikna man·taiengahani gimin ia gital sabisiko chel·chaksona gita Meghalaya a·dokona re·napbaenggipa manderangko porikka ra·e nisoenga ine sorkari official-rang parakataha.
Iani bidingo talataniko on·angengon, da·ororo a·gilsak gimikon COVID-19-ni ‘Omicron’ rokomko nikna man·engahani gimin health official-rang mikrake kamrangko ka·soenga aro skangoni dakbaenga gitan gipin biaprangoni re·napbaenggipa manderangko porikka ra·e nisoenga ine Health department-ni Principal Secretary Sampath Kumar parakataha.
“Skangoni ja·rikbaenggipa apsan niamrangkon da·oba ja·rikangkugen aro gipin a·dokrangoni re·baenggipa manderangko bilakbate porikka ra·e nianggen,” ine Kumar aganaha.
COVID-19-ni gital rokom nakattaiahani gimin mitam seokgimin a·dokrangode re·a doanirango gital niamrangko ja·riktokengaha ine janapatengon, “Gipin a·dokrangoni re·baenggipa manderangko chinga see rakkienga aro gipin biaprangoni re·baenggipa manderangko dingtang napate dongatan baksana gipin niamrangkoba ja·rikatenga. A·gilsakni gipin biaprangoni re·bagipa manderangkoba chinga see rakkienga,” ine Principal Secretary parakataha.
Meghalaya a·doko COVID-19-na mikrake donganiko watgalkujaenga aro gittamgipa changna COVID giprorotaianiona sorkari, mikrake kamrangko ka·soenga ine adita salrangna skangsan a·dokni Health Minister James K Sangma-ba parakatahachim.
COVID-19-ni gital ‘Omicron’ rokomko re·anggipa antio skanggipa changna South Africa a·songo nikchengahachim.