SHILLONG: Garo Hills-ni manderang da·o dipet Trinamool Congress (TMC) dolko ra·chakna man·kujawa ine Sonibar salo, Tura-ni BJP MDC Bernard N Marak parakatenba, 2023 bilsini Meghalaya Assembly election-o Congress aro TMC-ni gisepo vote-rangko sualgrike Garo Hills-o bang·bata seat-rangkon BJP-sa chegen ine an·tangni ka·dongsoenganiko parakataha.
“Garo Hills-ni manderang TMC-ko ra·chakna man·kujawa. Vote-rang pipraani a·sel 2023 bilsini Assembly election-o Congress ong·gijagipa aro TMC ong·gijagipa dolrangnasa cholrang ong·gen aro ian BJP-na nambatgen,” ine Meghalaya a·doko BJP-ni vice president-ba ong·enggipa Marak parakataha.
Mukul Sangma-ni dilanichi Congress dolni MLA-rang, TMC-o napahani gimin Garo Hills-o TMC bilakbagnok ine agananikoba Marak, raken jegalataha.
2023 bilsini Assembly election-o TMC chu·sokgipa ong·na man·jawa ine janapatengon, Meghalaya a·doko BJP bilakbatrorobaengaha aro Congress dolni bang·a dilgiparangan BJP-ona re·batokskaengaha ine Tura-ni MDC parakataha.
Meghalaya a·doko TMC-ni ‘Khela hobe’ ba kal·susaani ong·gen ine agangipa kattarangna aganchakaniko on·angskaengon, Meghalaya a·dokni BJP dolo namgipa ‘goalkeeper’ donga aro uamang TMC-ko warachakna namen ka·dongenga ine Marak parakataha.
Tura MDC-ni parakatani gitade, West Bengal a·doko gita Meghalaya a·dokoba chegipa ong·na TMC-ni ja·ku de·aniara chu·sokgipa ong·jawa.
“Uamangni ‘khela hobe’ kattara West Bengal-o cholinaba gnang indiba Meghalaya a·dokode cholijawa,” ine Marak aganaha.
