SHILLONG: Hynniewtrep National Liberation Council (HNLC) bobil dol, Bangladesh a·jao tambu rike dongjaha ine a·kangatani ja·manba dolni bang·gija cadre-rang dongkuenga ine Border Security Force (BSF) dol Mongolbar-o a·kange aganaha.
Kobor ra·timgipana BSF Meghalaya Frontier DIG, D. Haokip-ni aganani gitade bobil dolni bilakani namen komiaha.
Bang·gija jarangna skang East Jaintia Hills, Khliehriat aro Shillong a·jarango Improvised Explosive Device (IED)-ko gale HNLC-ni jingjengatani ja·man BSF dol ia statement-ko on·aha.
Haokip-ni aganani gitade sima-ario nokdangni ma·drang-maharirang aro una chakgiparang dongani gimin bang·gija cadre-rang Bangladesh-ona re·anga re·baa dakenga.
“Bobil dolni tambu rike donggipa Bangladesh a·jao dongja,” ine BSF Meghalaya Frontier DIG aganaha.
Sing·anina uni aganchakani gita IIGs (Indian insurgent groups) dol, Bangladesh-ni adita a·jarango mongsongbate Chittagong a·bri ja·retrango bang·en dongenga aro bang·gija Meghalaya Frontier-ni sima-arirango dongenga ine nirikkigiparang didiataha.
Indiba, uni aganani gita Bangladesh sorkari aro BGB, a·songo IIGs (Indian insurgent groups) donganiko pangnan jechakatronga.
“IIGs (Indian insurgent groups), Bangladesh-o dongchakenga. Indiba, baita sak donga uko talna gita man·ja,” ine Haokip aganaha.
BSF Meghalaya Frontier DIG-ni aganani gitade bilsi 10-rangna kingking Bangladesh-ko da·o chalaienggipa sorkari IIGs (Indian insurgent groups)-na sinjetaniko on·engachim aro uamangni bang·a tamburangko nosto ka·e galaha.
“Chingni ma·siani gitade dingtangmancha uamang tambu rikede dongjaha. Indiba, adita IIGs (Indian insurgent groups)-ni manderang Bangladesh-oni India-ona re·baa re·anga dake dongenga,” ine Haokip aganaha.
Uni aganani gitade Chittangong Hills track-o NLFT aro adita bobil dolrang dongenga.
Uni aganani gitade darang IIGs (Indian insurgent groups) tambu rikame dongja. Gimik gimang ge 125 BOP (Border Out Post)-rangko songna ge·etataha, ine ua aganaha, indake da·o dipet ge 117 BOP-rangko tariman·aha, aro dongkuenggiparangko tarienga.
BSF Meghalaya Frontier DIG-ni aganani gitade gital BOP-rangna proposal on·giparang donga.
“Indiba, uamang gital BOP-rangna proposal on·nako ra·chakna gita man·jaenga maina gital BOP-rangko songchina ge·etatgiparangni kamrangan matchotkujaenga. Proposal-ko ra·chakna gita adita somoi aro salrangko nangkugen,” ine Haokip aganaha.
