TURA: Meghalaya a·dokni gitcham chief minister aro Songsak constituency-ni MLA Mukul Sangma da·o Indian National Congress (INC)-oni ong·kate All India Trinamool Congress (AITMC)-o napskaahani gimin Garo Hills-o skanggipa changna AITMC-ni tom·bimonganiko Budbar salo, Songsak-o ong·atangaha.
Mukul Sangma-ni AITMC-o napangani ja·man una kamko ka·enggipa bang·bea manderangba, Mamata Banerjee-chi dilenggipa AITMC-o napangtokaha aro uandaken Budbar salo, AITMC-ni bilakaniko mesokna gita ia tom·bimonganiko ong·atangaha.
Ia tom·bimonganiko ong·atanio a·dokni gitcham chief minister aro Meghalaya a·doko Trinamool Congress-ni dilgipa Mukul Sangma, jinmana aganprakangengon, an·tangni Congress doloni ong·kate AITMC-o napskaani gimin talatanirangko on·angaha.
India a·songo aro Meghalaya a·dokoba Congress dol mongsonggipa opposition dol ong·genchimoba BJP dolni kamrangko champengna man·jaengani a·sel BJP dol bilakbaroroengani giminsa ua gipin dolo nape BJP-ni ong·gija kamrangko champengna manchiaha ineba Sangma aganaha.
Mukul Sangma baksana Congress dolni sak 11 MLA-rangba Congress doloni ong·kate AITMC-o napangani ja·man da·o Congress dolni gipin dilgiparang aro Congress dolna kam ka·enggipa bang·a manderangan Trinamool Congress-o napangna a·bachengtokaha.
Indake ong·genchimoba, Meghalaya a·doko Congress dolni dilgiparang aro Congress-na kam ka·enggipa bang·a manderangan Trinamool Congress-ona re·angtokaha ine agananiko Congress dolni gital working president aro a·dokni gitcham minister Deborah C Marak jegalatskaaha.
