Garo Hills-o be·enni gita cholgri ong·gipa manderangni salko manianga

TURA/AMPATI: Be·enni gita cholgri ong·gipa manderangna on·gimin bilrangni gimin talataniko on·na gita Sukrobar salo International Day for Persons with Disabilities ba be·enni gita cholgri ong·gipa manderangni salko Garo Hills-ni dingtang dingtang biaprangoba maniangaha.
West Garo Hills a·jao ia salko Rongram C&RD Multi Facility Centre-o maniangaha aro ia manianio West Garo Hills a·jani Deputy Commissioner Ram Singh, mongsonggipa sokgipa ong·e bakko ra·angaha aro unbaksana Rongram C&RD Block-ni BDO Shelley Momin aro gipin officer-rangba dongpae bak ra·angaha.
Ia program-ko West Garo Hills District Social Welfare Office-ni gita ong·atangaha aro ia program-ko ong·atanio West Garo Hills a·jani Deputy Commissioner Ram Singh, tom·bagiparangna aganprakangengon, be·enni gita cholgri ong·gipa manderangba pilak kamrangon apsan dakgipa cholrangko ra·e bak ra·pana man·na gita uamangna on·gimin bilrangni gimin talate on·na aro cholrangko mesoke on·na gita bilsiantian ia sal gitao be·enni gita cholgri ong·gipa manderangni salko a·gilsak gimikon manienga ine parakangaha.
Bilsiantian December-ni 3 tariko ia be·enni gita cholgri ong·gipa manderangni salko a·gilsak gimikon manirongenga aro uandaken ia salko South West Garo Hills a·jaoba, dingtangmancha be·enni gita cholgri ong·gipa manderangna on·gimin bilrangni gimin agan-talate on·na aro be·enni gita cholgri ong·gipa manderang baksa bakrimaniko mesokna gita South West Garo Hills a·jani Betasing Development Block-ni ning·o donggipa Banduraja Multi Facility Centre-o maniangaha.
Ia program-ko ong·atanio Ampati-ni Senior Medical & Health Officer Dr Lydia Marak, mongsonggipa sokgipa ong·e jinmana aganprakangengon, COVID-19-na su·enggipa tikani bidingo manderangni ma·sisretengani gimin talatanirangko on·angenba, iandakgipa jangbingbanganirangko bebera·gija, an·tangtangko ia kenbegnigipa sabisioniko chel·chakna gita tikarangko su·e ra·china manderangko didiangaha.
Songsalni kamrango be·enni gita cholgri ong·gipa manderangkoba bak ra·china didiangengon, songsalko dingtangatanio an·tangtangni changa sapani aro u·i-ma·sianirangko jakkalchina gita Dr Marak, be·enni gita cholgri ong·gipa manderangko didiangaha.
Ia program-ko District Legal Services Authority (DLSA)-ni Advocate Samir Chakravorty-ba dongpae jinmana aganprakangengon, be·enni gita cholgri ong·gipa manderangna aino on·gimin bilrangni gimin agan-talate on·angskaaha.