SHILLONG: Meghalaya a·dokni skotong songjinma Shillong-o mingsinggipa Umiam chibol mongsongbatgipa tourist-ni a·dam ong·engaha, indake Meghalaya Tourism Development Corporation, re·baenggipa bilsio Meghalaya a·dokni Golden Jubilee-ko manina skang adventure tourism-ko a·bachengatna am·enga.
Iani bidingo, MTDC-ni Chairman Saleng Sangma-ni aganani gitade a·doko tourist-rangko bang·batatna gita Corporation, parasailing, jet ski aro cable car-rangko Umiam Lake-o a·bachengatna gita manchiengaha.
Unbaksana, ring-rangko donchakna gita chibol rikamo riknaba manchienga, mongsongbate Orchid Resort-o jeon sokbagiparang private jet ski aro adita chonchongipa ring-rangko jakkalna gita cholko man·gen.
A·doko nitogipa ong·telaigipa dingtang dingtang biaprangko pattiman·aha, indake tourist-rangko a·dokona salbana gita man·engaha, ine Sangma aganaha. Indake, a·doko donggipa nitogipa biaprangko mangmang taridapnasan nangaigen aro indake ja·ku de·anichi a·dokni dingtang dingtang biaprangko mongsongbatgipa tourist-ni a·dam ong·atna gita man·gen.
Iana agreba, a·dok sorkari, Upper Shillong a·jao cable car-rangko a·bachengatna gita manchienga aro indake chanchianirangko bimang ong·atna man·genchimode tourism sector namen dal·rorogenchim.
Manderang Guwahati-o a·bachengatgipa ropeway-o gadona gita bang·en timolenga aro indake Shillong-oba cable car-ko a·bachengatna man·genchimode tourist-rang bang·batrorogen, ine Guwahati, Brahmaputra chibima kosak gita ropeway-ko a·bachengatgipako toe ua aganaha.
MTDC chairman, uni proposal-ko nichina gita Chief Minister-ko aganataha aro CM, re·baenggipa bilsio golden jubilee manina skang Umiam Lake-o para sailing-ko a·bachengatna gita namen kusi ong·enga.
“Chief Minister-na anga project-o gamchatgipa aro nangchongmotgiparangni bidingo talataha aro ua da·o dipet projectni gimin poraie nienga,” ine Sangma aganaha.
