NONGSTOIN: West Khasi Hills District, United A·chik Youth Federation (UAYF), West Khasi Hills District, Mawshynrut Civil Sub Division-ni ning·ogipa Shallang aro Rengdim-o salantian bijoliko kimitani aro bijoli wata tik ong·gijani bidingo Power Department-ko jak ra·enggipa Deputy Chief Minister Prestone Tynsong-na matnange chittiko seataha.
Deputy Chief minister Prestone Tynsong aro Local MLA Gigur Myrthong-na matnange seatgipa chittio, UAYF-ni president Ledison G. Marak aro Zimichryst G. Marak, General Secretary indake janapaha Shallang West Khasi Hills district a·jolo ua jolni manderangna mongsonggipa badingchiwal bajar a·dam ong·a aro uajol song 300-mang donga jeon songanti aro nokanti da·ororo chasongo gipin a·jolrango gitan bijolio pangchakgiparang ong·a.
Ua a·jolrangni badingchiwalgiparang, cuber cell, bojoli dokkan, skulni bil gnanggipa aro poraigiparangba bijoli pangchakgiparang ong·a. Rasong griebee Shallang a·jol aro gipin jolrango chinga salantian bijoli kimitsimsimako man·enga indake a·jolni song 300-mang songanti-nokanti neng·nikako man·enga.
Songrang Rengdim, Nengdawak, Matchok kan·ram, Wakpangram, Bokchung, Khalu A and Khalu B, Khalu (Garo Hills), Rongtok, Rengchi, Rangram, Seningkri and Goreng A village, unagreba jasku batpilengjok bijoli donggija donga. Unigimin nokanti aro poraigiparang department-ni simsakgijanichi bijoli dongjae chu·gimik an·dal-mindik ong·e dongna nangenga, uamang u·iataha.
“Songni skotong aro songni manderang Weat Khasi Hills district ning·ogipa Riangdo-ni SDO, MePDCL sub-station-na u·iataha indiba department simsakja aro galchipaiaha, uamang aganaha.
A·jolo nokantian bijoli dongjae an·dalmindik dongna nangenga baksana bijolini bilrang bang·e bang·e sokenga aro uamang bilrangko gamna draaenga. Uni gimin a·jolni NGO-rang department-ni kamrangna suk ong·jaenga, uamang aganaha.
Indake ong·engon, UAYF dol, sorkari aro department-ko mongsongbate Riangdo-ni power sub-station-o kam ka·enggipa officer-rangko ua obostarangko niatchina aro man·a dipet ta·rake uajolni manderangni neng·nikaniko namatchina gita mol·molataha, jedakode kosako janapgimin gita gipin a·dok ba a·songrango gita ua jolni manderangba apsan namgnirangko man·pagen ine UAYF aganaha.
