SHILLONG: Re·baenggipa 2023 bilsini Meghalaya Assembly election-o All India Trinamool Congress (AITC)-ko seokgenchimode a·dokni manderang dingtanganiko nikna man·gen ine AITC-Meghalaya-ni president Charles Pyngrope parakataha.
“2023 bilsio chinga manderangni seokaniko man·e sorkariko rikna man·genchimode a·doko dingtanganiko aro namgipa sorkariko ra·bana anga ku·rachakenga,” ine Pyngrope, kobor ra·timgiparangna aganaha.
AITC-ni miksonganirangko aro a·doko ra·gatna miksongenggipa kamrangni bidingo uamang bakan manderangna u·iatgen ineba Pyngrope parakataha.
“Chingni campaign ka·aniko a·bachengatahaon chinga chingni program-rangko manderangna talate on·anggen,” ine ua aganaha.
Pyngrope-ni aganani gitade, AITC-ni namgipa program aro scheme-rangni a·selan West Bengal-o manderangni bakrimaniko man·aha aro changgittamna kingking sorkariko rikna man·aha.
Da·o Meghalaya Assembly election-na bilsisamangsan dongaiahani gimin a·dokni dam 60 constituency-rango bilakatna somoirang chu·onggenma ine sing·on, skango Congress dolni chee dongenggipa biaprango Trinamool Congress bilakgipa ong·skana man·gen aro ian uamangna namgipa chol ong·gen ine Pyngrope parakataha.
“Komibeoba dam 12 constituency-rangode chinga pangchakani dongmanaha aro anga ka·donga pilak constituency-rangon manderang AITC baksa bakrimgen. Block level-o badita sak manderang AITC-o napgen, kattade uasan,” ine ua aganaha.
AITC-ko ‘Bangla party’ ine agananiko jegalatengon, pilak national party-rangan non-tribal dolrangsa ong·aia aro Congress dolko bikotchenggipa manderangba bang·batan Bengalirangsa ong·achim ine AITC-M-ni president parakataha.
