AMPATI: Mongolbar salo, South West Garo Hills a·jani District Horticulture Office aro Agricultural Technology Management Agency (ATMA) nangrimenba, Kisan Mela-ko Ampati-o ong·atangaha aro ia Mela-ko ong·atanio District Horticulture Office-ni gita game ge·e cha·giparangna gama ge·anio jakkalgipa a·salrang aro jo·ong siatani samrangko suale on·angjolaha.
Ia Kisan Mela-ko ong·atanio South West Garo Hills a·jani ning·o donggipa dingtang dingtang songrangoni game ge·e cha·giparang bakko ra·angenba, an·tangtangni game ge·e man·gipa bosturangko palna sim·na aro manderangna mesokna gita cholrangko man·aha.
Ia Kisan Mela-ko ma·mong sorkarini ra·gatgipa scheme-rang, chong·motan Mission for Integrated Development of Horticulture (MIDH) aro Soil Health Card-ni ning·o ong·atangaha aro ia mela-ko ong·atanio game ge·e cha·enggiparangsan ong·aigija dingtang dingtang department-rangba stall-rangko done bakko ra·angaha.
Ia Kisan Mela-ko a·bachengatanio South West Garo Hills a·jani Deputy Commissioner Ch Ramakrishna, mongsonggipa sokgipa ong·e jinmana aganprakangengon, game ge·e cha·enggiparangko dingtang dingtang pale sim·e cha·aigija apsan nangrime bading chiwalaniko dakchina didiangaha.
An·tangtangni janggi tangani gadangko nambatatna gita dingtang dingtang department-rang baksa nangrime kam ka·china game ge·e cha·giparangko aro producers group-rangko didiangengon, an·tangtangni game ge·e man·gipa bosturangko nambate bading chiwalna man·na gita MBDA, MSRLS, NRLM aro iTEAM-rang baksa agangrikchina didiangaha.
A·gilsakni dingtang dingtang biaprango nikna man·enggipa COVID-ni gital rokom ‘Omicron’-ni gimin talataniko on·angengon, COVID-19-ni batrikrikaniko warachakna dongimin niamrangko ja·rikchina aro tika su·kugijagipa manderangko tika su·e ra·china gita SWGH a·jani Deputy Commissioner didiangaha.
