TURA: Re·anggipa Sombar attamni 8:00 bajimango, ma·sina man·gijagipa mande sakgni, mikkangtangtangko katipenba, Tikrikilla jolo donggipa Dotdronggre songni Ningson N Sangma minggipa mandeni nokona re·ange uko ka·saninggija dake goe galangaha ine kobor on·aha.
Koborko on·ani gitade, Sombar attamni 8:00 bajimango Ningson Sangma, mi cha·manenba babilsi sambao neng·take dongengachim aro ua somoio rang·gitik mikkang katipgipa mande sakgni ua biapona re·bae, uamangni ra·bitbagipa silchidarechi uko goe galangaha aro ja·mano uni gitokkoba matsramgipa bostuchi rageke ua biapona katangaha.
Ia manderang, uko so·otna skang, ia mandeni depante aro demechikgiparangkoba nokoni ong·katjachina ka·mikkenatahachim.
Ia a·selni bidingo nokni manderang, Mongolbar pringosa Tikrikilla Police Station-na kobor on·aha aro Mongolbar pringo police-rang, ia mandeni nokona re·ange ia a·selni bidingo sing·sandieaha.
Indake ong·engon, iandake dosgri me·apa mandeko ka·saninggija dake so·otgalangahani gimin Tikrikilla-ni Nokma & Gaonbura Association raken jegalataha aro dos dakgipa manderangko ta·raken rim·china gita police-rangko didiataha.
“Iandake dosgri mandeko so·ote galaniara jolo manderangni tom·tome songdong a·chaaniko so·sojengjeng ong·ata gita ong·aha aro ia kamko chinga raken jegalenga. Mikkangchi ia jolrango iandakgipa a·selrang ong·taijana gita dos dakgipa manderangko ta·raken rim·e nanga gita sastirangko on·china chinga didienga,” ine Nokma & Gaonbura Association-ni convenor Walseng N Sangma parakataha.
