TURA: Me·a bi·sa saksako dolong kosakoni chiringona galonatgipa video social media-o giproroangani ja·man, ia bi·sako galongipa manderangni kosako Garo Students Union (GSU) Mindikgre regional unit-ni president Greneth M Sangma, FIR ka·doangaha.
Ia video-ko Facebook-ni ‘The All Garo Hills Times Now (Republic Report’ ingipa group-o watatahachim aro ia video-oniko nikna man·ani gitade, adita sak panterang, me·a bi·sa saksako uni gong·gijako rim·drae, metre 20-mang chugipa dolongoni chiringona galonatahachim. Rasong gnange ia me·a bi·sa maming saknaani gri chio ga·akoneaha aro ua jroe an·tangko jokatna man·aha.
Ia video-ko social media-rango manderangni watpripraatani ja·man bakan GSU Mindikgre unit-ni president Greneth Sangma, Baghmara Police Station-ni officer-in-charge-o FIR ka·doangaha. Sangma-ni FIR-o janapatani gitade, ia a·sel South Garo Hills a·jani Siju police station-ni ning·o donggipa Garugittim songo ong·ahachim.
Ia a·selni bidingo am·sandianirangko dakenba, me·a bi·sako chio galongipa manderangni kosako nanga gita ja·kurangko de·chinaba ua FIR-o dabiangaha.
