SHILLONG: Congress dolni badi ka·aniko man·e Congress doloni ong·kate katgipa sak 12 MLA-rangna show cause notice-ko on·angani ja·man a·dokni gitcham chief minister aro CLP-ni gitcham dilgipa Mukul Sangma baksana gipin MLA-rang, Budbar salo Meghalaya Assembly-ni Speaker-na aganchakaniko on·eaha.
Speaker-na aganchakaniko on·na re·angani somoio kobor ra·timgiparang baksa agangrikengon, Congress doloni ong·katgipa MLA-rangko disqualify ka·china sedoaniara MLA-rangni kosako pa·sike katta taridapna miksonganisan ong·aia maina uamang niamo pangchakesa Congress doloni ong·kate Trinamool Congress (TMC)-o napahachim ine Mukul Sangma parakataha.
“Je membor-an Congress doloni ong·katgipa MLA-rangni kosako badi ka·e sedoahachim, ua kakketko dongnuna aro MLA-rangni kosako katta taridapna jotton ka·e dakanisan ong·aia,” ine Sangma parakataha.
MLA-rangna show cause notice-ko on·ani ja·man pilak MLA-rangan, Indian Constitution-ni dongimin niamrango pangchake aganchakaniko on·manaha ineba Sangma parakataha.
Gitcham chief minister-ni aganani gitade, uamang 10th Schedule-o dongimin niam gita gipin political dolrang baksa bakrimna bakgittamoni bakgni ong·ani gimin ia niamko chu·sokatahachim.
Trinamool Congress baksa bakrimeani bidingo an·tangtangan re·ange talataniko on·china gita ia sak 12 MLA-rangna re·anggipa November-ni 25 tariko show cause notice-ko on·ahachim aro uandaken uamang Speaker-ni mikkangona re·ange an·tangtangni talate on·gipa chittiko on·eaha.
Meghalaya a·dokni bang·bata biaprangon manderang Congress doloni ong·kate TMC-o napskana miksongtokengaha ineba Sangma parakataha.
Photo: Congress doloni ong·kate Trinamool Congress-o napanggipa MLA-rang, Assembly-ni Speaker-ko grongna skang, apsan chanchirimenga.