TURA: Da·o dipet bank-ni dingtang dingtang kamrangna porikkarangko sechakgipa biaprang dongkujaengani a·sel Garo Hills-ni chatro chatrirang, gipin biaprangonasa re·ange porikkarangko sena nangtokengani gimin Garo Hills-oba State Bank of India (SBI)-ni banking examination centre-rangko kulie on·china gita Federation of Khasi Jaintia & Garo People (FKJGP) Garo Hills Zone (GHZ), Tura Chandmary-o donggipa SBI Regional Business Office-ni Regional Branch Manager-na sedoataha.
FKJGP-GHZ-ni general secretary Raksrang A Sangma-ni parakatani gitade, SBI-mangmangsan a·song gimiko donggipa bank ong·enga aro salgro salaram a·dokrangoba SBI-ni branch-rang ta·raken giproroenga. SBI-ni branch-rang giproroengon, chadamberangna kam ka·e cha·ani cholrangba ong·katskaengachim indiba Garo Hills-ode bank-ni kamrangna porikka sechakani biaprang dongkujaengani gimin chatro chatrirang, gipin biaprangonasa re·ange porikkarangko sena nange neng·nikanirangko man·na nangtokenga ine Sangma parakatenba, ia neng·nikanirangko chel·chakna gita Garo Hills-oba banking examination centre-ko kulie on·china gita SBI-ni official-rangko didiataha.
“Da·o dipet SBI-ni banking exam centre-rang Meghalaya a·dok gimiko Shillong Bara Bazar-o damsa aro Shillong-ni Ramakrishna Mission-o damsasan dongengpiti aro iani a·selan Garo Hills-oni bank-ni porikkarangko sena nangenggipa chatro chatrirang neng·nikanirangko chagrongna nangtokenga. Garo Hills-o poraienggipa chatro chatrirang pilakan chol donggiparang ong·paja aro uandaken Shillong songjinmaona re·ange re·bapilani aro donga cha·anirango koros ong·e neng·nikanirangko chagrongna nangtokenga,” ine FKJGP-GHZ-ni general secretary parakatenba, SBI-ni exam centre-ko Tura-o damsa aro Garo Hills-ni gipin biapo damsa kulie on·china gita SBI-ni official-ko didiataha.