SHILLONG: Nagaland a·doko dosgri manderangko sipai dolrangni so·ote galani ja·man, salgro salaram jolo donggipa dingtang dingtang dolrang, Armed Forces (Special Powers) Act (AFSPA)-ko ra·galpilchina dabitokengon, AFSPA-ko ra·galani bidingo ma·mong sorkari baksa agangrikna North East Democratic Alliance (NEDA) nambatgen ine Bristibar salo, Meghalaya a·dokni Deputy Chief Minister Prestone Tynsong parakataha.
“Chingni dolba NESA-ni bakan ong·engani gimin anga bebera·a ia AFSPA-ko ra·galchina ma·mong sorkari baksa agangrikna gita an·chingni Chief Minister, NEDA baksa ja·kuko de·chongmotgen,” ine Tynsong parakataha.
Salgro salaram a·dokrangoniko AFSPA-ko ra·galchina ua an·tangba nangnikenga ineba Tynsong aganaha.
Nagaland a·doko dosgri manderangko sipai dolrangni so·ote galani ja·man AFSPA-ko ra·galpilchina gita a·dokni Chief Minister Conrad Sangma-ba ma·mong sorkariko didiangahachim.
“Ia AFSPA-ara salgro salaram a·dokrango songdongenggipa manderangna bang·en saknaani aro duk mikchinirangko ra·baahani gimin ia niamko India sorkari ra·galpilna nangchongmota. Ia niamko salgro salaram a·dokrango ra·gatanichi maming namgnirangko man·jaenga batesa manderang neng·nikanirangko man·enga,” ineba Tynsong aganaha.
Indake ong·engon, Opposition dolni MLA PT Sawkmie-ba a·doko aro salgro salaramni gipin a·dokrangoba bang·bata joltangni political dolrangan NEDA-ni bak ong·engani gimin ia AFSPA-ko ra·galchina gita NEDA baksa ia dolrangan, ma·mong sorkariko didina nangenga ine parakataha.
Ia NEDA-ko 2016 bilsini May 24 tariko BJP dol, salgro salaramni dingtang dingtang dolrang baksa bakrime bikotahachim aro ia NEDA-ni convenor-na da·o Assam-ni chief minister ong·enggipa Himanta Biswa Sarma-kon seokahachim.
Meghalaya a·dokni NPP, UDP aro gipin dolrangba ia NEDA-ni bak ong·paengachim.
