TURA: A·chik Holistic Awakening Movement (AHAM) Central Executive Board (CEB)-ni president Champion R Sangma baksana sakgipin dilgipa, kamtangko wate politics-ni kamrangko ka·skana manchiahani gimin AHAM-CEB-ni mitam kamrangko gital dake sualpiltaiaha ine kobor on·aha.
Champion Sangma-ni kamtangko watangani ja·man, Sonibar salo AHAM-CEB-ni dilgiparang, tom·aniko ong·atangenba, AHAM-ni gitcham vice president George Prince Cheran Momin-ko president songskana tik ka·angaha ineba u·iataha.
Indake ong·engon, AHAM-CEB-ni chief organising secretary Cherian Momin-ba kamtangko wate politics-ni a·bao kamko ka·skana tik ka·ahani gimin AHAM-ni dilgiparang uni kam watanikoba ra·chakangaha aro uni biapo Bromio Marak-ko AHAM-CEB-ni gital chief organising secretary songskaaha ine u·iataha.
AHAM-ko bikotdilgipa Champion R Sangma, adita salrangna skangsan Congress dolo napangahachim ine nikna man·a.
